#جواب

جواب غرق عينيا دموع
و جالى بالغلط يمكن
و كان عنوانه انا موجوع
ياريت تسمعنى ان امكن
فى بدا حديثه كان كاتب
مش حاسس باى امان
و جرحى خلاص صبح واعر
فى خانة الاسم كان انسان
و خانة المهنه كان شاعر
سعيد جدا كما المعتاد
لا هياثر فى قلبى الشوق
ولا هايهنى حتى بعاد
ولا هحزن ولا هضعف ولا هندم
انى عرفت يوم اوغاد
صحيح فعلا كتير ضحيت
و من عمرى و حنانى اديت
و وقت الاحتياج ما لقيت
حد فى قلبه جرام اخلاص
لكنى خلاص يجوز مليت
يجوز مبقاش فى عندى كلام
يعبر ع الى جوايا
يجوز فى بعادكوا انى بقيت
بشوف العزله دى غايه
او انى بقيت مؤمن
بان القرب مهما يطول
بتبقى الفرقه ليه نهايه
خلاص عندى معدش فى شئ
اخاف انه يضيع منى
و شكرا للى فارقونى
وداعكم مش هيقتلنى
و لو كان البعاد مؤلم
فربى كريم وهايعنى
و لو ع الوحده هتعود
و اصاحب ليلى و نجومه
فى كام شخص اندبح بفراق
و بالضحكه خفى همومه
لكن بينه و بين نفسه
دموعه مغرقه هدومه
و قلبه بيستغيث بالله
محدش شال جراحه معاه
بيدعى يوماتى ع الى اذاه
محدش فيكوا عندوا دواه
غير الى خلقنا من روحه
وحده بيستمع بوحه
و الشكوى لكل الناس
بتبقى اهانه و مذله
لكن للرب فيها شفاه
قالولوا معاك و مش هنسيب
صحاب و اخوات حبيب و قريب
جراحه زايده مش بتطيب
و صبحت وحدته مانساه
محدش غيرها عاش وياه
و كام صوره كانت ذكرى
و كام رسمه لقلوب و سهام
و كام ورقه بلون ابيض
عليها حروف رموز و كلام
و صبحت صفره م الركنه
جراحهم فى الصميم ساكنه
و صعب تدوب معا الايام
معرفوش ان ببعادهم
حكموا عليه و بالاعدام
و لو سالونى يوم عنكم
هقول انه قدر مكتوب
او انى انا المعيوب
او كنتم بلاء م الله
عشان عاصى و كلى ذنوب
و لو كانت قلوبكوا ازاز
بلاش ترموا القلوب بالطوب
منيش ايوب ولا هقدر
اعيش بالحزن و اتصبر
و جرحى كل يوم يكبر
و عاجزين الاطبا معاه
و قالوا ازاى يكون ميت
لكن جواه فى روح و حياه
مفيش فى ايدينا شئ يعمل
صبح امره فى ايدين مولاه
سامحنى ان كنت بكلامى
صحيت الجراح جواك
لا تعرفنى ولا عارفك
لكن اودعت سرى معاك
و لو فكرت مره تحب
ياريت تحذر و تفهمنى
طريق الحب اخره هلاك
راح تسمع وعود ياما
و راح تغرق فى دوامه
و تبقى نهايه محتومه
لا صاحب ولا حبيبه معاك
يارب ما تبقى يوم زيي
ولا للحب يوم تحتاج
و فى الامضاء انا الشاعر
و بتاسف على الازعاج

#Ahmed_Hassan